綜合外媒報導，美國科羅拉多州布隆菲（Broomfield）嘅弗蘭克（Jillian Frank）一家，由舊年底開始經歷咗一場「噩夢」。佢哋屋企後院竟然多次被神秘人投擲塞滿冰毒嘅香腸，導致屋企兩隻愛犬蓋博（Gable）同莫里（Murray）相繼中毒送院，場面極之驚悚！
最離譜係，弗蘭克嘅媽咪本身係素食主義者，所以當佢舊年 11 月喺院子發現香腸嗰陣經已覺得「唔對路」，點知掰開一睇，入面全部係晶狀體！雖然弗蘭克話佢哋同鄰居關係良好，一直以為係隨機事件，但到咗 12 月 26 日，狗狗蓋博食咗不明物體後開始不停原地轉圈、瘋狂喘氣，驗血證實中咗冰毒。更誇張嘅係本月 22 日，另一隻狗狗莫里竟然驗出埋搖頭丸（MDMA）成份，直情係想攞狗狗條命！目前弗蘭克一家經已喺屋周圍裝晒監視器，仲喺圍欄上面加裝咗「防護天網」，防止再有人掟毒肉腸入嚟。警方正全力追緝呢位極之冷血嘅疑犯。