綜合外媒報導，伊朗革命衛隊（IRGC） 31 日發表震撼聲明，正式將包括 Apple、Google、Meta、Microsoft、Nvidia 以至 Tesla 在內嘅 18 家美國頂尖科技公司列為「攻擊目標」！伊朗指控呢啲公司係設計同追蹤暗殺伊朗官員嘅「主要元素」，並宣布由德黑蘭時間 4 月 1 日（星期三）晚 8 點起，隨時會對相關單位發動「摧毀性」報復。
聲明用語極之嚴厲，直接叫呢啲公司嘅員工「立即離開工作場所」以保命，甚至建議中東地區住喺呢啲公司方圓 1 公里內嘅居民全部疏散。其實伊朗呢番話唔係「靠嚇（嚇唬）」，早喺 3 月初，亞馬遜（Amazon）喺阿聯酋同巴林嘅數據中心就經已遭受過無人機嘅「直接打擊」。隨住伊朗高層相繼陣亡，德黑蘭明顯經已豁出去，要將報復對象擴大到支持美以軍事行動嘅科技資本。