綜合外媒報導，俄羅斯攝影師布魯列娃（Julia Buruleva）舊年 11 月喺印度「粉紅城市」齋浦爾拍攝咗一輯藝術照，將 70 歲嘅溫順母象「查查爾」（Chanchal）全身塗上鮮艷嘅螢光粉紅粉末。雖然攝影師話係「藝術靈感」，但隨住查查爾喺今年 2 月突然離世，成件事隨即引爆全球怒火！
雖然飼主同當地管委會解釋，當時用嘅係印度節慶常用嘅天然彩粉「Gulal」，而且只係查咗 10 分鐘就洗乾淨，判定死因係 70 歲「自然衰老」，但網民完全唔收貨。大家紛紛留言怒斥：「為咗影張相，要一個老人家（老象）受咁嘅罪？」呢件事仲驚動咗印度著名女星兼動保倡導者甘古利（Rupali Ganguly）。佢除咗公開哀悼查查爾，仲直接寫信畀總理莫迪，強烈要求全國禁止騎象活動，並提議用「機器大象」嚟取代傳統儀式，既可以保留文化，又可以保護動物。目前拉賈斯坦邦林業部門經已介入調查，睇下拍攝過程有無違反野生動物保護法。