綜合外媒報導，日本校園畢業季又到，但今年最吸睛嘅絕對唔係咩清純校花，而係呢位自稱「小學生辣妹」嘅 Rumina（るみな）！佢喺 3 月 19 日正式從小學畢業，佢媽媽喺 X 平台分享咗幾張相，隨即引發網民大地震。相入面嘅 Rumina 頭髮挑染成搶眼粉紅色，著住成身閃到爆嘅粉紅制服，仲配埋經典「白色泡泡襪」同「恨天高」厚底鞋，加上精緻濃妝同華麗假指甲，呢種超成熟嘅「辣妹系」打扮，令 360 萬網民睇到眼定定。
其實 Rumina 早就係日本綜藝節目嘅常客，仲參加過「年齡不詳美女」單元。當時現場嘉賓知道佢仲讀緊小六，個個都嚇到「下巴跌落地」。有趣嘅係，呢位望落去似 20 幾歲嘅辣妹，平時個 X 帳號其實係由佢阿媽一手包辦管理。媽媽仲感嘆話，個女入學嗰陣得 120 cm，依家經已長到 154 cm，真係大得好快。雖然外表行極端辣妹風，但 Rumina 私下其實仲有一顆童心。佢受訪時透露，平時最鍾意同朋友去公園盪鞦韆。佢仲大方分享過自己嘅素顏相，相中嘅佢清純可愛，同「戰鬥裝」完全係兩個人。