綜合中媒報導，中國航空工業集團前董事長譚瑞松，25 日喺遼寧大連中級人民法院一審被判處死刑，緩期2年執行。呢位曾經嘅航空界領軍人物，被揭發由 1998 年開始一直貪到 2024 年，整整 20 幾年入面，利用職權「中飽私囊」超過 7 億人民幣！
法院查明，譚瑞松嘅貪腐手段可謂「全方位」。除咗利用企業併購、承攬項目收受 6.13 億受賄款，佢仲侵吞咗近 9,000 萬公款。最令投資者憤怒嘅係，佢仲利用內部消息搞「內幕交易」兼洩密，幫自己同他人喺股市收割利益。大連法院形容佢「數額特別巨大」、「情節特別嚴重」，原本係死罪難逃。不過， 64 歲嘅譚瑞松最終獲判「死緩」，係因為佢到案後表現「積極」。佢唔單止如實供述，仲主動交代咗好多辦案機關都未知嘅貪污事實，被認定有「重大立功表現」，加上錢財經已全部追繳，法院先至網開一面，判處死刑但不立即執行。