綜合外媒報導，自從 2 月 28 日被美國同以色列空襲之後，伊朗政府經已連續兩星期嚴密監控通訊同網絡。不過，人可以封、網可以斷，官方嘅「大外宣」就反而變本加厲！據《CNN》報導，唔少伊朗民眾近日都收到由革命衛隊發出嘅「洗腦短訊」，宣稱伊朗正喺呢場戰爭中獲得「全面勝利」。呢啲短訊內容聲稱伊朗已經完全控制荷姆茲海峽，極大地提升咗左右全球經濟嘅能力；短訊仲大言不慚咁話，鄰近地區嘅美軍基地經已全部關閉。革命衛隊嘅如意算盤係想捏造戰況，令國內民眾相信國家即將贏得最後勝利。
不過，呢套「洗腦大法」似乎唔係幾奏效。有伊朗民眾接受訪問時大爆心聲，雖然依家好難接觸到外界資訊，每日只能夠睇國營媒體嘅「樣板戲」，但大家心中都有把尺。佢哋透露，依家民眾之間都有個心照不宣嘅共識：「只要係官媒講嘅嘢，大家都會自動假設事實係相反嘅。」