綜合外媒報導，美國國務院近日正式發出全球懸賞令，開出最高 1,000 萬美元嘅巨額獎金，徵求 10 名伊朗軍事同情報高層嘅「金手指」線報，名單榜首正正係近期「神隱」中嘅新任最高領袖穆傑塔巴（Mojtaba Khamenei）。
呢次「重金尋人」計畫主要針對伊朗伊斯蘭革命衛隊（IRGC）嘅核心成員。穆傑塔巴一直未曾露面，美軍防長更踢爆佢可能經已毀容。今次美國「落柯打」追緝嘅除咗穆傑塔巴，仲包括伊朗安全首長拉里賈尼、情報部長哈提布同內政部長莫梅尼等猛人。美國國務院直斥，呢班人領導嘅革命衛隊係全球恐怖活動嘅幕後黑手。最令網民關注嘅係，美國今次除咗畀錢，仲提供埋「一條龍」售後服務！懸賞網站喺 X（前稱 Twitter）上面公開招手，話提供情報嘅人唔單止有獎金攞，美國政府仲可以幫手「搬屋」兼重新安置，實行幫你「洗底」去第二度生活。