綜合外媒報導，古巴民生陷入「大崩潰」！由於長期面對嚴重停電、燃料短缺及糧藥不足，加上美國嘅石油封鎖令當地雪上加霜，古巴民眾嘅怨氣終於爆煲。中部位於莫隆（Moron）嘅小鎮 14 日凌晨爆發罕見暴力抗議，一間共產黨辦公室慘遭示威者突襲，大樓門口更燃起熊熊烈火，場面失控！據報，今次騷亂由 13 日晚嘅和平集會演變而成。起初民眾只係表達對大停電同缺糧嘅不滿，點知去到凌晨時分，一小撮憤怒嘅示威者開始向共產黨辦公室投擲石塊，甚至將接待處嘅家具搬出大街「燒垃圾」縱火，大批群眾喺現場激動高嗌「自由（Libertad）」。
除了政治地標受襲，部分國營機構包括藥局同政府經營嘅市場亦淪為攻擊目標。當局事後火速採取行動，目前已知有 5 人被捕。古巴總統卡內爾（Miguel Díaz-Canel）隨即開腔「補鑊」，承認長時間停電帶嚟嘅痛苦係可以理解，但佢隨即將矛頭指向美國，將所有問題歸咎於「美帝」封鎖。卡內爾強調，雖然民眾嘅訴求合理，但絕對唔會容忍破壞安寧嘅暴力行為。