綜合外媒報導，各位貓奴平時見到主子無論點跌都「腳先著地」，係咪覺得好神奇？原來呢個叫「落貓問題」（falling cat problem）嘅現象，經已困擾咗物理學界足足 200 幾年，甚至被視為世界級難題。近日日本山口大學（Yamaguchi University）研究團隊終於幫大家搵到答案：貓咪之所以能夠凌空優雅翻身，全靠佢哋脊椎入面深藏不露嘅「胸椎結構」！
科學界一直覺得貓翻身動作好似違反咗「角動量守恆定律」（簡單講就係無外力好難憑空旋轉）。但山口大學日暮康夫博士同團隊研究發現，貓背部中段嘅胸椎，靈活度竟然比下背腰椎高出近三倍。呢種極致嘅柔軟度，令貓可以將身體拆開做「前後兩截」，向相反方向扭轉。
當貓咪喺 1 米高處跌落嚟嗰陣，佢哋會玩一套極之複雜嘅「物理操」。首先，貓會縮起前爪減少轉動慣量，令上半身可以好似花式溜冰選手咁快速轉向地面，同時伸長後腿增加慣性，確保下半身維持穩定。等上半身鎖定好地面目標後，貓就會進行反向操作，轉為伸展前爪並收縮後腿，利用同樣原理將下半身「甩返」落嚟。成個過程中，因為前半身同後半身嘅扭力互相抵銷，整體角動量其實無變，完全無違反物理定律！研究團隊形容，貓簡直係天生嘅「物理大師」。所以下次見到主子跌唔親，唔好再話佢哋有九條命，應該話佢哋條脊椎真係「柔軟到唔科學」！