綜合外媒報導，住喺奈良公園過千年嘅「神明使者」竟然集體離家出走？近日日本大阪街頭出現咗極之罕見嘅畫面：最少 6 隻來自奈良嘅野生鹿，竟然翻越咗海拔 642 米嘅生駒山，行咗成 20 公里落到大阪東部。無論係公園、馬路邊，甚至尋日（22 日）仲有人影到有鹿喺 JR 野江站入面悠哉遊哉咁「巡舖」，令當地住咗幾十年嘅街坊都大呼：「活久見！」
點解呢班「神鹿」要咁辛苦移居大阪？原來背後係一場生存鬥爭。據「奈良鹿愛護會」統計，舊年奈良鹿數量高達 1,465 頭，創下史上新高。原因竟然同我哋呢班遊客有關——太多外國遊客貪得意，用人類食嘅高熱量零食亂餵，搞到鹿群「營養過剩」瘋狂繁殖。結果公園入面嘅草同樹果根本唔夠分，競爭太激烈，部分比較弱勢嘅鹿唯有被迫遠走他鄉，落到大阪搵食。
不過，呢份「驚喜」亦帶嚟唔少麻煩。由於奈良鹿係日本受保護嘅「天然紀念物」，法例規定只有奈良嘅團體可以管。依家佢哋過咗界去到大阪，奈良愛護會「手長莫及」救唔到，大阪政府又未有管理經驗。專家擔心鹿群喺市中心亂衝會引發交通意外，或者因為驚慌而撞傷行人。大阪市政府經已發出呼籲：見到鹿群千萬唔好靠近或者餵食，以免發生「人鹿衝突」。