綜合外媒報導，伊朗國家女子足球隊喺澳洲參加亞洲盃期間，爆發大規模「變節」事件！由於全體球員喺賽前公開拒絕唱國歌，隨即被伊朗官方媒體打成「戰時叛徒」。事件演變成政治風波，球隊中 5 名球員率先脫隊出走，獲澳洲政府發放人道簽證；而喺返國最後一刻，再有 1 名球員及 1 名職員臨陣申請政治庇護，令獲庇護人數增至 7 人。
澳洲內政部長柏克（Tony Burke）週二爆料，話呢次庇護行動係一次「精密部署」。球員喺雪梨機場通關準備返國之際，澳洲當局特意將球員同隨行嘅監控人員分開，並安排「個別談話」。柏克強調，成個過程無催促、無施壓，目的係確保呢班女將喺無恐懼嘅情況下作出人生抉擇。最終呢 2 名新申請者成功脫隊，同早前獲簽證嘅 5 名隊友會合。
至於其餘隊員已於週二深夜離境，經吉隆坡返國。不過，喺佢哋離境之前，女足下榻嘅酒店同機場外都湧現抗議潮。大批伊朗裔澳洲人試圖攔截球員，擔心佢哋一旦返到伊朗就會「失蹤」甚至面臨生命危險。事關伊朗國營電視台已經將佢哋定死罪名為「叛徒」，而喺伊朗，叛國罪最高可被判處死刑。呢班勇敢嘅女將回國後命運如何，依家全世界都極度關注。