綜合外媒報導，歐盟國家生仔意欲持續低迷，直情跌入「人口陷阱」！根據歐盟統計局最新數據顯示，2024 年歐盟成員國嘅總和生育率僅得 1.34，比起 2023 年嘅 1.38 進一步縮水，正式創下自 2001 年有紀錄以來嘅歷史新低，情況令人擔憂。數據顯示，2024 年全歐盟只有 355 萬名 BB 出生，「粗出生率」（每千人活產數）由 2000 年嘅 10.5 顯著插水到 7.9。雖然歐盟生育率喺 2010 年前後一度反彈至 1.57 嘅高位，但自 2021 年起就開始「自由落體」，一路跌到依家嘅 1.34。專家指出，一般發達國家要維持人口規模不變，生育率起碼要達到 2.1，如果跌穿 1.3 就屬於「極低生育率」，隨時引發社會運作危機。
除咗「唔肯生」，歐洲女性亦愈嚟愈「遲生」。統計發現，歐盟女性生第一胎嘅平均年齡，由 2001 年嘅 29 歲推遲到 2024 年嘅 31.3 歲。如果按國家分析，保加利亞以 1.72 成為全歐「最強生力軍」，法國以 1.61 緊隨其後；相反，馬爾他、西班牙同立陶宛就慘變「墊底王」，當中馬爾他生育率僅得 1.01，即係平均每位婦女只係生一個仔，人口負增長壓力爆燈。