綜合外媒報導，阿聯酋（UAE）嘅富查伊哈（Fujairah）再次傳出爆炸聲， 阿聯酋防空系統雖然攔截咗一架伊朗無人機，但彈片不幸落入附近農田，奪走咗一名孟加拉籍外勞嘅生命。自 2 月 28 號戰爭爆發以嚟，阿聯酋經已因為伊朗嘅襲擊累計有 11 人死亡（包括 9 名平民同 2 名士兵），成為波斯灣國家入面傷亡最慘重嘅一個。
面對無休止嘅騷擾，阿聯酋嘅態度經已發生咗「 180 度大轉變」。根據《華爾街日報》（WSJ）爆料，消息人士透露阿聯酋經已準備好協助美國及其盟友，採取「武力手段」去打通被伊朗封鎖嘅荷姆茲海峽！呢個決定意義重大，因為阿聯酋極有可能成為戰爭爆發以嚟，第一個正式加入戰團、同伊朗「硬碰硬」嘅波斯灣國家。阿聯酋之所以咁硬頸，除咗因為受夠咗襲擊，亦都係受到特朗普（Donald Trump）之前「石油係你哋自己嘅責任」呢番話所刺激。阿聯酋目前正喺聯合國遊說發起一項授權動武嘅決議案，甚至考慮動用佢哋精銳嘅 F-16 機隊同無人機參與掃雷同護航行動。