綜合外媒報導，根據《美聯社》爆料，以沙特阿拉伯同阿聯酋（UAE）為首嘅美國海灣盟友，正喺私底下瘋狂「吹哨」，要求特朗普（Donald Trump）絕對唔可以撤軍，一定要繼續對伊朗發動攻勢，直到德黑蘭政府徹底崩潰或者「變乖」為止。
呢班海灣國家官員認為，雖然美軍經已炸咗一個月，但似乎仲未足以令伊朗「斷氣」。最令人意外嘅係，阿聯酋依家竟然變咗做「最強硬派」，正極力說服特朗普下令發動地面攻勢，唔好只係喺天上面炸。科威特同巴林亦都企喺同一陣線，覺得要「一鋪清袋」解決伊朗威脅。不過，海灣盟友入面亦都有「和事佬」。阿曼同卡塔爾就傾向用外交途徑解決，擔心戰火一旦失控會燒到全中東。但沙特態度非常硬淨，佢哋同美國講，如果而家就結束戰爭，根本達唔成任何「好協議」，更加保證唔到海灣國家嘅長遠安全。