如果你屋企個灑水壺賣幾草嘢，咁 LV 話你知：加個 Monogram 就可以賣貴一千倍！LV 最近推出男裝春季預售系列，當中一款名為「Watering Can」嘅手袋成為全城熱話。呢個袋唔止個名夠直接，連造型都係 100% 還原平時用嚟淋花嘅水壺，連個「灑水處」都做埋蓮蓬頭孔洞，吸睛度簡直爆燈。
根據官網資料，呢個「灑水壺」售價高達 36,000 元人民幣，連掛喺旁邊嘅小配件都要 7,750 元人仔。雖然外表似水壺，但內裡依然係 LV 招牌嘅 Monogram 塗層帆布配牛皮飾邊，仲有拉鍊隔層畀你放銀包、電話同鎖匙。產地遍布法、西、意、美，實行「環球園藝風」。對於呢款咁大膽嘅設計，LV 門市員工就話：「呢類袋唔係賣畀大眾嘅常規款。」佢仲透露設計師之前仲出過「龍蝦包」同「吐司包」，專門針對鍾意玩嘢、追求獨特性嘅高端客群。而官方客服就解釋，設計靈感係嚟自春季「萬物復蘇」，水壺象徵孕育新生命，非常有寓意。