綜合中媒報導，如果你喺自己菜園挖出一隻「人手」，你第一反應會係報警定係驚到走佬？廣東揭陽一名老伯最近就經歷咗呢場心跳加速嘅意外。佢喺自家菜園挖淮山嗰陣，竟然挖出一根造型極度擬人嘅「淮山手」，唔止有齊五隻手指，連最前端都有埋酷似「指甲」嘅輪廓，嚇到老伯當場倒抽一口涼氣。
據老伯嘅女婿黃先生喺 17 號透露，呢條「手形淮山」最左邊嘅指頭比較短，比例上同人類手掌簡直係「倒模」一樣。消息傳開之後，竟然有「重口味」買家出價高達 8,000 元人民幣想收購呢件藝術品，但老伯屋企人暫時婉拒咗，仲考慮緊到底係賣咗佢，定係留返嚟做紀念。面對呢單靈異傳聞，專家隨即出嚟「定驚」。專家解釋，淮山喺地底生長嗰陣，如果撞到硬石、土壤硬度不一或者其他植物嘅根部，塊莖就會「隨機應變」改變生長方向，形成各種異形外觀。雖然呢隻「魔之手」睇落幾恐怖，但其實營養價值同普通淮山一模一樣，食落口完全無分別。