好多專業，隨年資會更有保障。但運動員一過了高峰，面對嘅可能係朝不保夕嘅退役生活。有幾多運動員可以於退役後，轉型成功如做教練，去維持生計？記得早幾日見到張相，係一個中國體操運動員在地鐵行乞。

如此難做嘅專業，每四年一次嘅最大型舞台，香港竟然有個中學教師，就一件符合奧運標準要求嘅球衣，竟然對港隊成員講：「你唔想代表香港就退賽」，引發軒然大波。曾擊敗名將林丹的伍家朗，連16強都入唔到，小組賽出局。賽後都坦言事件對佢有影響。

但最重要的問題，是如何支持運動員。那些出名及有獎牌嘅，成A+運動員有每個月四萬蚊，加上贊助及廣告，即使退役後亦不太難轉型，在香港還算生活應該不成問題。但低收入嘅香港運動員係講緊得7千蚊嘅津貼，呢類香港運動員，不是要屋企人經濟支援，就係要做野搵錢，咁樣點可以令到佢地專心練習？ 而在退役後更可能是無人問津，轉型困難。

港隊羽毛球雙打教練，早幾日接受電台訪問時講，香港嘅運動事業嘅資源不足。個節目中李立峰講了「一千萬由兩三個人分，定係用於其他地方，值得討論」當然獎勵攞獎嘅香港之光，係絕對正確嘅。但如果可以支援埋整體運動發展更好。

呢度就要輕輕提下「青訓」，全世界嘅運動強國，都有好廣泛嘅青訓系統。我唔用「完善」，因有啲地方連體育設施都唔夠，但都會廣泛吸納當地小朋友，除了搵有潛質嘅，都培養埋做唔成運動員嘅小朋友做運動嘅興趣，有啲仲指長遠嚟講可減輕醫療系統嘅負擔。

不過香港嘅「青訓」除了不廣泛外，亦都不斷進行淘汰，可被全資支援嘅青訓人數是極少數。不禁要問，個餅本身咁細，都可以出到咁多為港爭光嘅出色運動員，如果當局同商界投放多啲資源，會變成點呢？

不過都仲有個好現實嘅問題，在港隊取得佳績時歡呼聲不斷下，有幾多家長會願意，個小朋友細細個就以專業運動員嘅方向，俾個小朋友自細就專心一致接受青訓。呢個係好現實嘅考慮，所以到頭來，都係講緊要有充裕及用得其所嘅資源，同如何保障運動員退役後嘅生活。