綜合外媒報導，不少人煮苦瓜時，總愛將中間白色的「瓜囊」刮走丟掉，以為那是苦味來源。不過日本蔬果專家堀基子提醒，原來這部分不但唔苦，仲係營養寶庫，維他命C含量更高達果肉嘅1.7倍。堀基子表示，實際試食過瓜囊就會發現幾乎冇乜苦味。苦瓜本身維他命C含量已係檸檬嘅約1.5倍，如果連囊一齊食，營養價值再升級。
佢補充，苦瓜嘅維他命C屬耐熱型，炒、炸都唔怕流失，仲可配合油脂促進β胡蘿蔔素吸收，「苦瓜炒蛋」、「苦瓜味噌湯」、「天婦羅」等菜式都係又健康又入味嘅選擇。堀基子亦推介「瓜囊炸蔬菜」做法：將瓜囊去籽撕成細條，配上薄切苦瓜邊，沾天婦羅漿炸香，即成酥脆小食。挑選時，建議揀色澤深綠、有光澤、刺粒飽滿同手感紮實嘅苦瓜；保存則可用膠袋包好放入雪櫃蔬菜格。