講起北美最乾燥、最熱嘅「死亡谷」（Death Valley），大家腦入面肯定係一片死寂嘅啡色沙漠，但最近呢度竟然「死而復生」，仲靚到令人窒息！受惠於過去半年嘅反常降雨，呢個全球最酷熱嘅國家公園正上演十年一遇嘅「野花大爆發」，原本荒涼嘅地景依家被一片金黃色花毯覆蓋，直情好似換咗畫咁。
公園管理員拉馬爾（Matthew Lamar）形容，大家平時以為呢度了無生機，點知依家色彩豐富到令人「嘩」一聲。今次花期係自 2016 年以來最震撼嘅一次，全因去年 10 月起死谷竟然落咗成年份嘅雨量，11 月降雨量更創下 44.7 毫米嘅歷史新高，令埋喺土入面休眠多年嘅種子集體「覺醒」破土而出。依家死谷周圍都係俗稱「沙漠向日葵」嘅金黃花海，中間仲夾雜住紫色鐘穗花同粉紅沙漠五點花，層次感爆燈。有特登由拉斯維加斯揸車去賞花嘅遊客吉伯特（Jackie Gilbert）就大讚，沙漠花朵喺極端環境下依然生存到，不過想去打卡就要快手，低海拔地區嘅花海預計只會維持到 3 月中下旬，遲咗就要等高海拔地區 4 至 6 月先有得睇喇。