綜合外媒報導，美國「公立常春藤」名牌學府俄亥俄州立大學（OSU）爆出轟動學界嘅性醜聞！擔任校長短短兩年、現年 66 歲嘅卡特（Walter ‘Ted’ Carter Jr.）週一（9日）突然宣佈「唔撈」，理由係自爆同埋一名女性存有「不正當關係」，更承認自己「公器私用」，允許對方接觸校方高層及利用公共資源支持個人業務。
雖然校方對女方身分大賣關子，但當地媒體同校報已經極速「起底」，目標直指獲政府資助嘅播客（Podcast）節目女主持人沃拉克斯（Krisanthe Vlachos）。據悉，沃拉克斯曾經多次喺節目訪問已婚嘅卡特。最精彩嘅係，《紐約郵報》仲請埋肢體語言專家「金睛火眼」去分析節目片段，專家直言沃拉克斯見到校長嗰陣，個樣好似「女學生見到偶像」咁初戀感覺爆燈，甚至用「黛安娜王妃式」嘅小鹿斑比眼神頻頻拋媚眼，反觀校長就表現得相對淡定。
今次醜聞對俄州大嚟講簡直係「雪上加霜」。事關該校嘅金主兼前校董主席、內衣王國 Victoria’s Secret 前老細魏克斯納（Les Wexner），早前被踢爆同已故富豪淫魔愛潑斯坦（Jeffrey Epstein）關係過從甚密，引發在校生喺上個月發起大規模抗議，要求校方將藝術中心嘅「魏克斯納」名號除名。依家連校長都因為「管唔住自己」同涉及利益輸送而辭職，呢間名校嘅聲譽可謂跌到谷底，究竟下一任校長要點樣收拾呢個爛攤子？