綜合外媒報導，美軍近日對伊朗石油命脈哈爾克島（Kharg Island）嘅「所有軍事目標」發動毀滅性打擊。最令外界震驚嘅係，特朗普喺轟炸後短短兩小時，就喺自家社交平台 Truth Social 上載咗一段長約 1 分鐘嘅黑白轟炸片段，親自向全球展示戰果。
片段中見到哈爾克島多處軍事設施喺強大火力下接連爆炸，火光沖天。特朗普仲喺帖文入面意氣風發咁形容，今次係「中東歷史上最強大嘅轟炸行動之一」。哈爾克島位於荷姆茲海峽西北方約 483 公里，一向係伊朗石油出口嘅「咽喉」，今次美軍直搗黃龍，無疑係想徹底切斷伊朗嘅經濟命脈。面對美軍嘅高調挑釁，伊朗軍方亦唔係省油的燈。伊朗武裝部隊聯合司令部隨即透過官媒發表硬氣聲明，警告任何對伊朗能源設施嘅攻擊，都會引發連鎖報復。伊朗更將威脅範圍擴大，表明報復目標唔單止係美軍，仲包括埋喺該區同美國合作嘅各國石油公司設施。伊朗軍方狠批，一旦衝突失控，呢啲設施將會面臨「毀滅性打擊」，最終只會剩返「一堆灰燼」。