綜合外媒報導，全球有超過一千萬人因角膜疾病失明，但由於器官捐贈長期「供不應求」，唔少患者只能喺黑暗中苦等。西班牙格拉納達大學（University of Granada）研究團隊近日就帶來好消息，佢哋成功利用街市常見魚類嘅魚鱗，研發出低成本、高透明度嘅人工角膜，有望打破移植手術嘅「供體荒」困局！
角膜係眼球最外層嘅透明組織，因為無血管，一旦受損好難自我修復。研究團隊發現，原本被視為「廢物」嘅魚鱗，竟然含有高品質嘅膠原蛋白，非常適合作為醫療物料。科學家將鯉魚等常見魚類嘅鱗片加工，製成高度透明且堅韌嘅植入物。初步實驗同動物試驗顯示，呢種「魚鱗角膜」生物相容性極高，唔單止無引發免疫排斥反應，功能表現仲相當理想。
今次研究最吸引嘅地方係「成本極低」。研究人員指出，魚鱗來源廣泛且易攞，將漁業廢棄物轉化為高附加價值嘅醫療產品，唔單止可以減輕患者負擔，仲可以推動當地漁業發展。雖然目前「魚鱗角膜」表現優異，但距離正式應用於人類臨床治療仍有一段路，未來仲要經過嚴格嘅人體試驗，以確保長期安全性。若果進展順利，呢項技術將成為治療嚴重眼疾嘅全新「平替」方案，幫更多人重見光明！