綜合中媒報導，內地媒體近日調查發現，網上熱賣、號稱產自西藏那曲嘅名貴「冬蟲夏草」，竟然有高達 75% 係偽劣品。最離譜嘅係，有黑心商家竟然用膠水將「亞香棒蟲草」嘅蟲身同草頭人工黏埋一齊，冒充真貨。呢類假貨喺 2025 年經已賣出超過 20 萬根，專家警告，呢類偽品含有微量毒素，食得多隨時「養生變傷身」！
記者深入調查發現，呢啲所謂嘅名貴藥材，發貨地竟然係江蘇一個糧油批發門店。工作人員仲大言不慚咁話，屋入面全部都係假貨，仲強調佢哋用嘅係幾十蚊一支嘅「高級食品膠水」，食落肚保證無事。此外，部分被平台列為「五星好店」嘅店舖，竟然係由湖北、廣東等小型工廠進貨，再貼上野生標籤高價發售。面對監管部門，商家仲囂張到話可以提供偽造資質嚟「應對」，完全無視法律。內地食安專家指出，不法分子正正係利用「資訊不對稱」同免責條款嚟搵食。專家教路，購買蟲草時要留意蟲體色澤，同埋觀察草頭連接位有無膠水痕跡。面對呢類「掛羊頭賣狗肉」嘅亂象，電商平台同監管部門絕對責無旁貸！