綜合外媒報導，今年 1 月被美軍「閃電生擒」嘅委內瑞拉前總統馬杜羅（Nicolás Maduro），依家喺美國過緊點樣嘅生活？據外媒爆料，呢位曾經呼風喚雨嘅領導人，依家正被關押喺紐約布魯克林大都會拘留中心（MDC Brooklyn）。佢唔單止失去咗權力，連生活空間都縮到得返約 80 呎，仲細過香港唔少劏房！
消息人士透露，馬杜羅目前被安置喺監獄入面最嚴密嘅「特別管制區」（SHU），呢度通常係用嚟關押極度危險或者有自殺傾向嘅犯人。馬杜羅嘅倉入面只有一張金屬床、一個馬桶同洗手盆，唯一嘅窗仔幾乎見唔到陽光。最悽慘嘅係，佢每星期只有 3 次、每次 1 小時嘅「放風」時間，而且每次行出倉門都要戴上手扣，由兩名獄警「夾住」先行得。
更戲劇性嘅係，每到深夜，整座監獄都會聽到馬杜羅用西班牙文歇斯底里咁大叫：「我係委內瑞拉總統！話畀我嘅國家聽，佢哋綁架咗我，喺度虐待我哋呀！」。有傳獄友同獄警都已經聽到耳繭都出埋。近日網上仲瘋傳一張疑似係馬杜羅喺倉入面受 24 小時監控嘅截圖，雖然獄方未證實真偽，但睇落呢位昔日強人嘅精神狀態似乎經已瀕臨崩潰。