綜合外媒報導，人體如果因為嚴重受傷、癌症或者感染導致大規模骨骼缺損，傳統上醫生往往要「拆東牆補西牆」，從患者身體其他部位挖取骨頭進行移植。呢種做法唔單止令病人要開多一刀，仲會增加感染風險同身體負擔。不過，瑞典隆德大學（Lund University）最近就研發出一種特殊的「骨修復框架」，有望徹底改變呢個困境。
研究團隊喺實驗室利用軟骨組織，透過特殊技術移除晒所有活細胞（即係「脫細胞化」），只留低一個充滿生長訊號嘅天然框架。呢個框架就好似一張精準嘅「建築藍圖」，一旦植入受傷位置，就會吸引人體自身嘅細胞入去「駐場」，並引導佢哋一步步長出新嘅骨頭，將框架慢慢取代。呢項技術最大嘅亮點係「現成（Off-the-shelf）」嘅特性。由於框架入面無活細胞，唔會引發強烈嘅免疫排斥反應，所以可以提前大量生產並儲存喺醫院，醫生隨時攞出嚟就可以用。研究負責人 Paul Bourgine 表示，呢種方法唔單止慳返病人開刀挖骨嘅痛苦，亦可以大幅降低醫療成本。
目前呢項技術經已喺動物實驗入面取得成功，並無出現排斥跡象。研究團隊正密鑼緊鼓準備進入人體臨床試驗階段，首要目標係針對手臂同腿部「長骨」嘅嚴重缺損進行安全性查證。如果進展順利，未來嚴重骨折嘅患者，可能只要植入呢塊「神奇藍圖」，身體就可以自動完成修復工程。