綜合外媒報導，日本有一位柴犬主人就分享咗一個「 春天嚟咗 」嘅判斷方法：只要伸手摸下主子，如果摸出嚟嘅毛量好似「漫天飛雪」咁，就代表換季正式開始！
呢位住喺長野縣與山梨縣交界山區嘅網友「柴犬たけちよ」，日前喺 X 平台（前稱 Twitter）分享咗一段震撼短片。片中見到佢輕輕喺愛犬身上來回撫摸，點知每摸一下，柴犬身上就會飛散出大量廢毛，畫面好似被吹散嘅蒲公英種子咁。樓主笑稱，呢份「驚人毛量」係柴犬每年迎接春天時最具代表性嘅答案。專家提醒，呢段時間最好每日幫狗狗梳毛，減少室內飛毛之餘，亦可以避免皮膚病。