綜合外媒報導，全球最大記憶體晶片龍頭三星電子（Samsung Electronics）正處於風暴中心！由於勞資雙方就加薪同獎金制度談唔埋欄，三星工會正發起投票，決定係咪喺 5 月發動大規模罷工。工會領袖更放話，行動目標係要令晶片生產「斷纜」，消息一出，全球科技界即刻進入戒備狀態。
作為韓國最大嘅「糧主」，三星喺當地有 12.5 萬名員工，當中約 9 萬名工會成員有權參與今次投票。工會主席崔承浩直言，如果資方唔肯妥協，佢哋計畫由 5 月 21 日起罷工 18 日。呢次行動針對嘅係首爾南方平澤（Pyeongtaek）嘅核心半導體基地，一旦成事，可能會導致該廠區約一半嘅產量報銷。
引發今次工潮嘅導火線，竟然係員工不滿「人工低過隔壁」。由於競爭對手 SK 海力士（SK Hynix）早前接受咗工會嘅加薪要求，唔單止底薪加得多，仲會將營業利潤嘅 10% 撥入獎金池。相比之下，三星員工覺得自己公司份糧「唔透明」兼且落後於人，導致過去三個月有過百名工會成員集體跳槽去 SK 海力士。三星工會目前要求底薪上調 7%，並要求獎金制度要同公司利潤直接掛鉤。雖然三星管理層警告，即使係一次短暫嘅停工，都會嚴重損害客戶嘅信任，甚至要用幾年時間先修補到。