綜合外媒報導，馬來西亞政府最近正大刀闊斧執行環境衛生法規，自今年 1 月實施「社區服務令」以來，經已成功取締咗超過一千名垃圾蟲。最令違規者崩潰嘅唔係罰款，而係要着住反光衣去掃街、通水渠，甚至係清洗公廁！
馬來西亞房屋及地方政府部長倪可敏18 日大派「定心丸」，不過係畀一班守法公民嘅。佢強硬警告，即使係隨手掉個煙頭咁細碎嘅行為，代價都係 2,000 令吉，外加最多 12 小時嘅社區服務。倪可敏仲爆出一句金句：「嗰隻丟垃圾嘅手，最終亦將會成為清理垃圾嘅手。」實行要垃圾蟲「自食其果」。目前經已有近千人中招，當中包括約 200 名外籍人士。如果你一次過做唔晒 12 粒鐘嘅服務，政府仲好「貼心」咁畀你分批執行，每日做 2 粒鐘。內容包括掃大街、清淤泥，最正係要洗公廁。倪可敏強調，呢條例係「眾生平等」，唔理你係本地人、外國遊客、大人定係細路，一律無情講！