綜合外媒報導，當全球司機都因為油價上升而叫苦連天，竟然有人喺背後「偷笑」兼發財？南韓首爾中央地方檢察廳23 日投下一枚震撼彈，派出「公正交易調查科」兵分多路，突擊搜查國內四間煉油巨頭：SK Energy、GS Caltex、S-OIL 同埋 HD Hyundai Oilbank，連帶「南韓石油協會」都無得留低，全線被搜！
呢班石油大亨涉嫌喺中東局勢動盪期間，私下達成協議「串通」操縱國內燃料同石油產品價格。簡單嚟講，就係懷疑佢哋借勢「托價」，將市民當成提款機。南韓總統李在明早喺本月 9 號經已「火都嚟埋」，公開點名話美伊一開波，國內油價就「即刻升」，明顯有人想利用亂局賺取暴利。李在明當時放出狠話，強調政府會嚴厲打擊呢類趁火打劫嘅行為。無論係「囤貨居奇」定係「共謀托價」，一經定罪，唔止要嘔返啲非法所得出嚟，仲要面臨數倍嘅罰款。