綜合外媒報導，原來特朗普內心深處住咗一個「搖滾靈魂」，美國總統特朗普 23 日去田納西州曼菲斯了解治安，忙裏偷閒去咗已故巨星「貓王」Elvis Presley嘅故居雅園（Graceland）參觀。一入到去，特朗普就直接「表白」話：「我哋熱愛貓王！」仲自爆係對方嘅鐵粉。
今次係美國史上第 2 次有現任總統造訪雅園（上次係 2006 年小布殊帶埋日本前首相小泉純一郎去朝聖）。特朗普對貓王嘅熱愛絕對唔係「講吓就算」，佢喺 2018 年就曾追授貓王最高平民榮譽「總統自由勳章」。參觀期間，導覽員拎出一把貓王 1973 年夏威夷演唱會彈過嘅吉他複製品請佢簽名，平時大鳴大放嘅特朗普竟然變到極之「斯文」，拎起簽字筆仲要求先喺紙上面試寫，確保墨水順暢，直言：「唔想毀咗呢把結他。」最令網民意外嘅係特朗普嘅「心水歌單」。佢透露自己最鍾意貓王嘅歌係〈Hurt〉，呢首歌係講緊被戀人背叛後傷得很深，卻依然深愛對方嘅悲情歌。呢種「鐵漢柔情」嘅選曲，同佢平時強悍嘅形象真係有好大反差。