綜合外媒報導，德國環保團體「德國環境援助」（DUH）早前入稟，想利用法律手段逼令汽車巨頭 BMW 同賓士（Mercedes-Benz）喺 2030 年起全面停售燃油車。不過，德國聯邦最高法院24 日正式駁回呢項具有指標意義嘅訴訟，判定個人權益並無受到車廠商業行為嘅直接影響。
DUH 原本引用 2021 年憲法法院嘅里程碑判決，主張國家有義務保護未來世代免受氣候變遷影響，並試圖將呢個原則「強加」喺私人企業身上。但最高法院作為民事同刑事嘅終審法院，最終決定維持原判，認為喺歐盟定下嘅期限（原定 2035 年）之前，市民唔可以要求車廠提早離場。呢個裁決對正喺度應對電動化轉型壓力嘅雙 B 嚟講，簡直係一支強心針。DUH 執行董事梅茨（Barbara Metz）對裁決表示極度遺憾，佢批評車廠為咗追求最大利潤，繼續賣出數以百萬計嘅燃油車。佢同時將矛頭指向聯邦政府，公開呼籲總理梅爾茨（Friedrich Merz）要加把勁推動氣候保護，唔好再將責任推嚟推去。DUH 目前正考慮是否要向憲法法院提出最終上訴。