綜合外媒報導，黑龍江海林市呢場意外絕對會令你心驚膽戰。今日（29 日）凌晨零時左右，海林火車站附近一棟至少 3 層高嘅商用大樓突然發生「毀滅式」崩塌！當時 1 樓火鍋店同上面嘅 KTV 正值營業高峰，現場傳出轟天巨響，成棟樓瞬間變咗一堆瓦礫，驚醒晒附近所有居民。
官方通報指，事件中共有 9 人被困。雖然到下晝搜救隊成功搵到其中 2 個人，但官方通報竟然用咗一個極之曖昧嘅字眼「身體情況不明」，既無話救得返，亦無話傷勢點，令網民大感不安。目前其餘 7 個人仲係生死未卜，救援工作仲喺瓦礫堆入面爭分奪秒咁進行緊。由於出事大樓緊鄰其他住宅區，附近居民依家個個「心慌慌」，擔心自己住緊嗰棟會唔會係下一棟「豆腐渣」。警方目前經已封鎖周邊道路，嚴禁車輛出入。至於呢棟 3 層高嘅樓點解會喺無地震、無火災嘅情況下突然「自爆」崩塌，當局仲未有交代。