綜合外媒報導，美國副總統萬斯（JD Vance） 28 日喺保守派節目《班尼秀》（Benny Show）入面，發表咗一連串令網民跌晒眼鏡嘅言論。當主持人問佢點睇不明異常現象（UAP，即係以前叫嘅 UFO）時，呢位虔誠嘅基督徒副總統直言，佢唔認為嗰啲係外星人，而係「惡魔」（Demons）！
萬斯形容自己對呢個課題極之「痴迷」，仲話魔鬼最勁嘅招數就係令世人相信佢唔存在。佢認為嗰啲喺天空飛嚟飛去、對人類做埋啲怪事嘅「天界生命」，其實可以用基督教嘅神學嚟解釋——即係宇宙入面存在緊良善同埋邪惡嘅力量。雖然佢坦承仲未睇過政府內部嘅機密檔案，但佢保證會花時間「查個水落石出」。
有趣嘅係，呢場「外星人大賽」連前總統奧巴馬（Barack Obama）都捲入埋。奧巴馬早排開玩笑話外星人係真嘅，結果要急急腳澄清話係配合氣氛；而特朗普（Donald Trump）就趁機喺 Truth Social 發火，宣布經已指示各部門準備公開所有關於地外生命嘅政府檔案。最令人起疑嘅係，美國國土安全部最近竟然悄悄註冊咗 alien.gov 同 aliens.gov 呢兩個官方網域，似乎真係有啲嘢「準備爆」！