綜合外媒報導，近日日本「網路內容海外流通促進機構」（CODA）代表理事後藤健郎發出警告：目前網上充斥住大量由 Gemini、Grok 同 ChatGPT 生成嘅動漫影像，無論係多啦A夢定係《鬼滅之刃》， AI 都可以做到高度神似，甚至開始出現 10 秒長嘅短片。
後藤指出，如果技術繼續進化到可以生成長篇動畫，日本傳統嘅內容產業將會面臨毀滅性打擊。雖然根據日本《著作權法》，使用他人作品原則上要攞授權，但目前根本無任何主流日漫作品正式授權畀 AI 公司使用。早稻田大學教授上野達弘更係放低狠話：未經授權就將 AI 畫嘅「山寨作品」公開，使用者同 AI 服務提供者都有可能要負法律責任！其實日本政府經已開始做嘢。 OpenAI 舊年推出影像服務嗰陣，因為角色輸出太似原作，被日本政府要求改善，而家經已加咗限制。不過，中國字節跳動（ByteDance）今年 2 月推出嘅新服務亦有類似問題，雖然仲未喺日本公開，但呢場「 AI 侵權戰」經已由國內打到去國際法庭，甚至有 AI 業者經已敗訴。