綜合外媒報導，日本近鐵京都線29日清晨發生列車脫軌事故。一班由京都車站開出嘅首班列車，駛離車站無耐突然發生脫軌，導致京都站至上鳥羽口站雙向列車全面停駛，大批趕返工返學嘅乘客大受影響。
事發喺清晨5時13分，該班開往奈良橿原神宮前車站嘅4節編組列車，喺京都站前方一個左轉彎位時，第2同第3節車廂突然偏離軌道。當時車上載有約10名乘客以及乘務員，好彩意外中無人受傷。受事故影響，近鐵部分路線出現嚴重延誤或取消，大批旅客滯留京都站。有當地市民話到車站睇到螢幕先知出事，雖然慶幸無人受傷，但一時間完全唔知點轉車。