綜合外媒報導，黑龍江海林市呢場意外絕對會令你心驚膽戰。今日（29 日）凌晨零時左右，海林火車站附近一棟至少 3 層高嘅商用大樓突然發生「毀滅式」崩塌！當時 1 樓火鍋店同上面嘅 KTV 正值營業高峰，現場傳出轟天巨響，成棟樓瞬間變咗一堆瓦礫，驚醒晒附近所有居民。
官方通報指，事件中共有 9 人被困。雖然到下晝搜救隊成功搵到其中 2 個人，但官方通報竟然用咗一個極之曖昧嘅字眼「身體情況不明」，既無話救得返，亦無話傷勢點，令網民大感不安。目前其餘 7 個人仲係生死未卜，救援工作仲喺瓦礫堆入面爭分奪秒咁進行緊。由於出事大樓緊鄰其他住宅區，附近居民依家個個「心慌慌」，擔心自己住緊嗰棟會唔會係下一棟「豆腐渣」。警方目前經已封鎖周邊道路，嚴禁車輛出入。至於呢棟 3 層高嘅樓點解會喺無地震、無火災嘅情況下突然「自爆」崩塌，當局仲未有交代。
綜合中媒報導，如果你前排被嗰段「 7 隻狗逃離狗販魔爪、護送受傷德牧返家」嘅片感動到流馬尿，咁你要坐定喇。呢段喺抖音、微博同 X 狂掃近億點閱嘅「英雄片」，最近被證實全屬網民「腦補」！原來呢班狗根本無被捉過，亦唔係咩越獄英雄，真相竟然係一場「全村追女神」嘅大龍鳳。
據《封面新聞》同《城市晚報》查證，呢 7 隻狗其實係吉林某條村嘅「街坊」，全部都有主人，平時放養慣咗。點解會集體喺公路上行？唔係因為要救受傷同伴，而係因為嗰隻德國牧羊犬當時正值發情期！嗰隻被網民讚到天上有地下無、話佢「不離不棄」守護女神嘅哥基，其實只係其中一名「追求者」。最好笑係網民喺真相出嚟之前，經已自編自導自演到出神入化，甚至用 AI 生成咗幾款電影海報，連「驚險逃生」同「與主人重逢」嘅假畫面都整埋出嚟。 CNN 評論指，呢單嘢反映咗喺 AI 時代，假訊息傳播得快過火箭，加上依家世界太多災難，網民太渴求呢類「心靈雞湯」，結果集體中招。
綜合外媒報導，印尼政府28日正式宣布，對全國 16 歲以下青少年實施社交媒體限制，成為東南亞第一個採取呢種「強硬手段」嘅國家。呢次行動直指 YouTube、TikTok、IG 同遊戲平台 Roblox 等「高風險」平台，要求佢哋必須阻止、甚至直接刪除 16 歲以下用戶嘅帳號！
點解印尼要玩到咁大？據調查顯示，印尼有成 7,000 萬名 16 歲以下嘅人口，當中竟然有一半人喺網上接觸過色情影像，仲有近半數受過網絡欺凌。通訊部部長哈菲德（Meutya Hafid）強硬表態：保護細路係共同責任，如果班科技巨頭唔聽話、唔符合新標準，印尼政府隨時會「大掣一拉」，限制佢哋喺印尼嘅存取權限。
目前，各大巨頭經已紛紛「跪低」配合。TikTok 計畫逐步刪除帳號，Ｘ（前稱 Twitter）直接將最低年齡提高到 16 歲，而 Meta（FB/IG 母公司）亦都話會加強家長監控功能。雖然 YouTube 話唔想「一刀切」，但喺印尼政府嘅高壓之下，相信都無乜討價還價嘅空間。呢項政策明顯係參考咗澳洲去年底實施嘅禁令，睇嚟全球「限網」嘅風潮經已殺到東南亞。
綜合外媒報導，3月28 日係曼谷恰圖恰區大樓倒塌慘劇一週年。舊年緬甸發生 7.7 級強震，全曼谷竟然得呢棟接近完工嘅「泰國國家審計署」大樓倒塌，導致 95 人死亡。呢棟大樓由中國中鐵十局承建，本來係想展現「廉潔形象」，點知一震即碎，變成泰國史上最醜陋嘅制度失敗標誌。
最令泰國人「火滾」嘅係，慘劇過咗一年，雖然有 23 間私人公司同高層被起訴，但政府官員竟然「一個都無事」！泰國反貪組織 ACT 主席馬納（Mana Nimitmongkol）開火怒轟，指調查報告至今仲係「遮遮掩掩」，完全無清晰嘅問責機制。明明審計署自己都承認設計同施工有缺陷，但講到要法辦官員，就變咗「得個講字」。對於罹難者家屬嚟講，賠償金根本係「買唔返條命」。其中一位媽媽帕尤，佢 17 歲嘅仔為咗幫補家計，趁暑假去打工，結果一去不返。雖然佢攞到 300 萬泰銖嘅賠償，但佢心碎咁講：「我只係想個仔返嚟。」更令人心寒嘅係，國家審計署由頭到尾都無向家屬講過一句對唔住。
綜合外媒報導，高球名將老虎活士（Tiger Woods）週五下午喺佛羅里達州住家附近發生嚴重車禍！當時佢駕駛越野跑車企圖超車，點知擦撞到一架拖住清洗機嘅卡車，架車隨即失控滑行並翻側喺路邊。據報活士由副駕駛座爬出嚟嗰陣，成個人神情恍惚，「醉態」明顯，嚇到目擊者即刻報警。
最離奇嘅地方係，警方到場後幫佢做酒精呼氣測試，結果竟然係 「零」！不過，由於活士神情極之有異，警方要求做尿液毒藥物篩檢，佢竟然一口拒絕配合。警方高度懷疑佢受到藥物影響（DUI），當場將佢拘捕帶回偵訊。根據當地法律，佢最少要喺監獄入面「冷靜」 8 小時先可以獲釋。連美國總統特朗普得知消息後都表示「非常難過」，指活士係佢嘅密友，近期確實遇到唔少困難。其實呢份「車禍清單」對活士嚟講經已係第三次： 2017 年佢試過因為服用混合止痛藥喺車內昏睡被捕； 2021 年喺洛杉磯高速衝出路面導致重傷；估唔到嚟到 2026 年，老虎依然未吸取教訓。
綜合外媒報導，如果你以為屋企隻貓最驚係沖涼，咁你就太小看佢哋對「睇醫生」嘅恐懼喇！美國堪薩斯州一隻橘貓，喺 21 日得知要去進行年度健康檢查嗰一刻，求生慾瞬間爆發，竟然使出「縮骨功」鑽入咗屋企張電動梳化底座。點知佢高估咗自己嘅身材，圓潤嘅肚腩不幸卡喺金屬支架同機械零件之間，嚇到主人要報警求救。
歐弗蘭帕克警察局（Overland Park Police）隨後公開咗救援相片，只見呢隻橘貓露出一個「我真係知錯喇」嘅驚恐表情，張大口向消防員求救。由於支架卡得太死，消防隊員出動咗螺絲起子同電鋸，一邊安撫呢位「阿金」，一邊小心翼翼咁拆解梳化。最後，為咗保住貓命，消防員別無選擇，只能忍痛將張電動梳化「分屍」鋸斷，先至成功救返佢出嚟。雖然搞到警察同消防隊大陣仗出動，仲犧牲咗一張梳化，但呢隻「阿金」依然無獲得「免死金牌」。警察局幽默證實，毛孩脫困之後，下一站依然係被載去獸醫院完成體檢。
26 日上午 11 時許，大埔汀角路近鳳園路一個回收場突然起火，現場唔單止火勢猛烈，仲傳出多次驚人嘅爆炸巨響，連遠處嘅大埔居民都話聽到。濃煙源源不絕咁衝上雲霄，成個天都被熏黑，場面極之恐怖。
消防接報後立即出動兩隊煙帽隊開喉灌救，並緊急疏散超過 100 人。呢場火造成咗 6 人受傷（35 至 63 歲），傷勢相當嚴重。其中一名 63 歲黃姓男子三級燒傷，而一名 58 歲李姓男子二級燒傷，目前情況危殆！仲有一名南亞裔男傷者，送院時雙手被保鮮紙包裹，面部完全被熏黑。附近嘅女村民心有餘悸，話當時聽到巨響後出嚟睇，見到火勢大到嚇死人，只能夠即刻同其他村民逃命。雖然火勢之後受控，但現場依然不斷冒煙，佢話暫時都唔敢返村：「只係希望大家無事。」消防處亦發出呼籲，提醒大埔市民如果受到煙霧或異味影響，一定要留喺室內並關好門窗。
綜合外媒報導泰國武里南府發生一宗極之離奇嘅家居意外，一名叫布隆勒特（Boonlert）嘅男子，因為胸口劇痛到要叫救命，鄰居聽住佢慘叫咗足足 2 個鐘先至報警。救護員到場嗰陣，佢痛到要㩒住心口行出嚟，但奇怪嘅係，佢身上完全無任何外傷流血。
醫生原本以為係心臟病發，點知一照 X 光，全場醫護都嚇到標冷汗，原來布隆勒特嘅胸腔入面，竟然橫插住一根長達 7 公分嘅縫衣針！最驚險嘅係，支針就喺心臟隔離，差少少就直接刺穿心瓣。因為位置太危險，普通醫院根本唔敢郁刀，要即刻將佢轉送到大型醫院進行續命手術。據親屬分析，布隆勒特平時下班返屋企習慣「大字型」躺喺床度休息，推測係之前縫補完嘅針遺留咗喺床單上面，佢一躺落去，支針就順勢「無聲無息」咁刺入咗佢嘅胸腔。鄰居蘇拉雅（Suranya）感嘆，聽到佢痛苦呼喊咗咁耐，真係好心寒。
綜合外媒報導，根據《自然》期刊今日發表嘅最新研究，科學家透過分析已知最古老嘅犬類 DNA，驚覺人類同狗仔「結盟」嘅歷史，竟然可以追溯到近 1 萬 6,000 年前。呢個發現直接將人類養狗嘅歷史紀錄，比之前推斷嘅時間再提早咗足足 5,000 年！
研究團隊喺現今土耳其嘅皮那巴希（Pinarbasi）發現咗一塊極之珍貴嘅頭骨碎片。慕尼黑大學嘅專家弗朗茲（Laurent Frantz）指出，呢塊碎片屬於一隻大約生活喺 1 萬 5,800 年前、只有幾個月大嘅「小母狗」。雖然佢外型仲好似隻小狼，但 DNA 顯示佢經已同純種灰狼分道揚鑣。更令人動容嘅係，呢隻小狗係被埋喺人類墓穴上方，顯示當時人同狗嘅關係經已非常密切。
點解冰河時期嘅祖先要養狗？科學家斯科隆德（Pontus Skoglund）話，養狗嘅「成本」其實好高，要分嘢食畀佢哋絕對唔易，所以呢啲古老狗狗肯定有不可替代嘅作用，例如幫手狩獵或者防衛屋企。弗朗茲仲補充咗一個超暖心嘅細節：雖然當時未必有「寵物」概念，但可以想像 1.6 萬年前嘅小朋友，一樣會同呢啲小狗玩耍。
綜合外媒報導，泰國暖武里府3 月 24 日晚警方喺當地一條供水運河發現多個黑色垃圾袋，打開一睇，竟然係一個用毛巾包裹住嘅女性頭顱！隨後警方喺附近 50 公尺範圍內，陸續搵到足足 8 袋屍塊，場面極之血腥駭人。
死者身分證實係一名 20 歲嘅老撾女子，兇手竟然係同佢同居 3 年嘅 26 歲男友 Tom。最令人心寒嘅係，曼谷公寓嘅閉路電視影到案發當日 Tom 幾次拎住黑色膠袋出入，其中一段畫面仲疑似影到佢「手提頭顱」離開，而死者入屋之後就再無出現過。Tom 殺完人後原本想逃往老撾，警方喺邊境及時將佢截獲。落網後呢位職業係「廚師」嘅男友竟然大話連篇，辯稱女友係因為做派對公關令佢呷醋，兩個人嘈交期間女友「拿刀自殘」，佢因為驚得滯先至將遺體肢解棄置。不過，死者哥哥踢爆，呢個男人平時就有家暴前科，根本係個「暴力狂」。
