綜合外媒報導，全球暖化打亂晒動植物嘅「生理時鐘」，當大部分物種都因為氣候變遷而面臨滅絕危機之際，科學家竟然發現咗一個「逆市奇葩」國王企鵝（King Penguin）。根據 11 號發表喺《科學先端》期刊嘅研究，呢群次南極嘅「居民」唔單止無因為暖化而數量減少，反而生機勃勃，成功率大增！
研究團隊追蹤咗約 1 萬 9 千隻國王企鵝，發現同 2000 年相比，佢哋嘅繁殖季平均提早咗 19 日。喺生物學上，通常物種因為暖化而提早活動，會導致「物候錯位」（例如花開咗但蜜蜂未到），最後導致物種衰亡。但國王企鵝就「變則通」，利用 10 月到翌年 3 月長達 5 個月嘅繁殖期彈性，提早交配，結果令繁殖成功率大幅提升約 40%。法國海鳥生態學家勒伯耶克（Celine Le Bohec）直言，咁好嘅適應力簡直係「前所未見」。除咗提早開工，國王企鵝仲係「搵食高手」。面對海洋升溫令魚群遷徙，佢哋識得靈活調整策略：有啲向南游去極鋒區，有啲向北走，甚至留喺附近搵替代食物。佢哋唔再「揀飲擇食」，除咗主食燈籠魚，見到咩食咩，生存能力極強。