綜合中媒報導，央視新聞近日爆出驚人內幕，指內地包括重慶、山東、安徽等嘅水產批發市場，為咗方便長途運輸同防止魚鱗脫落，竟然大規模使用非法麻醉藥。調查發現，魚販會喺運魚桶入面加入名為「魚護寶」、「暈魚王」等「三無」產品（無日期、無廠商、無許可證）。呢啲藥水主要成分係丁香酚，雖然可以令魚進入休眠狀態，方便搬運，但長期食用會損害人體嘅肝、腎功能。
更離譜嘅係，山東部分商家為咗追求更強效嘅「斷片」效果，竟然用埋含有劇毒甲醇嘅工業用酒精！甲醇一旦進入人體，輕則傷殘失明，重則攞命。最諷刺嘅係，安徽有商販將麻醉劑裝喺原本裝瀝青嘅藍色膠桶入面，完全無視食品衛生。而江西更有工廠將呢類工業原料包裝成「食品添加劑」出廠，形成一條完整嘅黑暗產業鏈。目前國家市場監督管理總局經已出手，喺重慶同山東查獲大量證物，唔少商戶經已承認有「餵藥」行為。