近日 Threads 流傳一段令人憤怒嘅片，事發喺 3 月 22 日晚約 11 時，屯馬綫車廂入面出現一名「掀裙色狼」。一名 26 歲女事主發文指，當時車廂明明唔擁擠，但一名男子偏要緊貼佢身後，仲疑似伸手「摷裙摸臀」。事主雖然覺得唔對勁，但第一反應係驚自己誤會，唯有一直「褪位」避開，直到完全遠離，該男子先至喺荃灣西站心虛下車。
本來事主仲喺度懷疑緊，點知現場另一名 18 歲女乘客主動行埋嚟，話自己啱啱都被呢個男人「摸咗」！最緊要嘅係，呢位 18 歲少女雖然好驚，但仍然好醒目咁用手機拍低咗男子侵犯第二名受害人嘅整個過程。兩名受害人商量後，決定唔可以姑息奸徒，於昨日（23 日）一齊去警署報案。
據了解，色狼喺短短 9 分鐘內連環出手，先係非禮 18 歲少女 5 秒，再對 26 歲事主施狼爪長達 12 秒。目前案件經已列作「非禮」處理，由深水埗警區刑事調查隊接手。事主喺網上發文感激對方伸出援手，並呼籲所有姊妹要小心保護自己。