綜合外媒報導，日本靜岡縣一間科技企業最近宣布，因為太多學生用 AI 生成履歷，搞到內容「公式化」兼誠信存疑，所以佢哋決定：唔再睇履歷！取而代之嘅，係請出一位「 AI 面試官」，同求職者進行長達半小時嘅深度對談，直接考驗你嘅反應同價值觀。
唔單止係咁，大阪一間科技公司仲玩得更盡，推出咗「虛擬人物面試」。面試官同求職者雙方都唔使露臉，大家用 Avatar（虛擬分身）溝通。最勁嘅係，面試官喺呢個階段完全唔知你叫咩名、邊間大學畢業，真正做到「盲選」。呢種做法唔單止可以減輕求職者嘅緊張感，仲可以排除晒所有外貌同名校偏見，等企業可以專心聽你講嘅內容，搵到真正有實力嘅生力軍。呢種創新手法喺日本求職界引起咗極大迴響。企業發現，比起睇嗰份可能係由 AI 代筆嘅履歷，透過虛擬對談反而可以發掘到一啲以前會被忽略嘅人才。